सुप्रशिद्ध उपन्यासकार बुद्धिसागर चलचित्रका निकै ठूला पारखी हुन् । प्रदर्शनमा आउने प्रायः चलचित्र उनी नछुटाइ हेर्ने गर्दछन् । चर्चित उपन्यास ‘कर्णाली ब्लुज’ का लेखक उनी अब आफूलाई स्क्रिप्ट राइटरको रुपमा पनि चिनाउँदैछन् । गएको करीब एक वर्षदेखि उनी चलचित्रको स्क्रिप्टमा काम गरिरहेका छन् । चलचित्रको नाम ‘बर्मजंगको भिडियो’ जुराइएको छ ।
यो चलचित्रको निर्माण लागत ४ करोडमाथि हुने निर्माता अर्जुन कुमार बताउँछन् । उनी अहिले आफ्नो हिट चलचित्र ‘चपली हाइप’ को तेस्रो सिरिजको तयारीमा छन् । यो चलचित्रको छायांकन पूरा भएपछि ‘बर्मजंगको भिडियो’ निर्माण गर्ने उनको भनाई छ । चलचित्रलाई मौलिक कथामा चलचित्र बनाउन माहिर मानिने रामबाबु गुरुङले निर्देशन गर्दैछन् ।
उनी अहिले चलचित्र ‘कबड्डी कबड्डी कबड्डी’ मा व्यस्त छन् । यो फिल्म प्रदर्शनमा आएपछि उक्त चलचित्र सुरु गर्ने सोचमा उनी छन् । चलचित्रले ३० वर्ष अगाडिको परिवेशको कथा वाचन गर्ने बताइएको छ । केही दिनमा चलचित्रका लागि प्रमुख कलाकारको छनोट गरिने निर्देशक रामबाबुले बताए । चलचित्रमा चलेका कलाकारको अभिनय रहनेछ ।
उपन्यासकार बुद्धिसागरले आफ्नै स्मृति आलेख ‘बर्मजंगको भिडियो’ माथि पटकथा लेखिरहेका हुन् । चलचित्रको छायांकन डोल्पामा हुनेछ । २ चरणमा छायांकन हुने यो चलचित्र अर्को वर्षको मध्यतिर प्रदर्शनमा आउने जानकारी प्राप्त छ । हाल बुद्धिसागर र निर्देशक रामबाबु पटकथामाथि छलफल गरिरहेका छन् । चलचित्र हेर्न मरिहत्ते गर्ने युवकको कथामा चलचित्र आधारित हुनेछ ।