‘लप्पन छप्पन २’ मा ‘एक्सन हिरो’ शिवको प्रवेश

‘एक्सन हिरो’ को रुपमा आफ्नो पहिचान बनाएका अभिनेता शिव श्रेष्ठ करीब ४ वर्षपछि चलचित्रमा कमब्याक गर्दैछन् । उनी चलचित्र ‘बागमती’ पछि पर्दामा देखिएका छैनन् । केही हप्ता अगाडि उनले चलचित्र ‘प्रेमगीत ३’ साइन गरेका छन् । यसमा उनले अभिनेता प्रदीप खड्काको पिताको भूमिका निभाउँदैछन् । चलचित्रमा उनको राजाको भूमिका छ । यो चलचित्रपछि उनलाई बाक्लै फिल्मको अफर आइरहेको छ ।

शनिबार दिउँसो अभिनेता शिवले मुकुन्द भट्टले निर्देशन गर्ने चलचित्र ‘लप्पन छप्पन २’ पनि साइन गरेका छन् । चलचित्रमा उनको महत्त्वपूर्ण भूमिका रहेको निर्देशक भट्टले बताए । अभिनेता सौगात मल्लको पिताको भूमिकामा शिव देखिनेछन् । भूमिका सकारात्मक रहेको निर्देशक भट्टले प्रस्टाए । शिवको प्रवेशसँगै ‘लप्पन छप्पन २’ मा कलाकारको लाइनअप बलियो बनेको छ । चलचित्र आइतबारबाट फ्लोरमा जाँदैछ ।

अभिनेता शिवले भूमिका राम्रो लागेर चलचित्रमा आबद्ध भएको बताएका छन् । उनी यो चलचित्रपछि ‘प्रेमगीत ३’ मा व्यस्त हुनेछन् । शिव र सौगातका अलावा यस चलचित्रमा दयाहाङ राई, अर्पण थापा, अनुपविक्रम शाही, नम्रता श्रेष्ठ, केरोलिन कोलिन्डा, सुरविना कार्की, सृजना सिना, देव कुमारलगायतका कलाकारहरुको पनि अभिनय रहनेछ । नेपालसहित अष्ट्रेलिया र युरोपमा चलचित्र खिचिँदैछ । पुरुषोत्तम प्रधानले चलचित्र खिच्दैछन् ।

चलचित्रको प्रदर्शन मिति महाशिवरात्रीको छेको अर्थात् फागुन ९ गतेलाई घोषणा गरिएको छ । चिजकुमार श्रेष्ठ र प्रजापति सिवाकोटीले निर्माण गर्ने चलचित्रको कार्यकारी निर्मातामा प्रकाश कुँवर र निर्मल कुमार मिश्र छन् । कथा, पटकथा र संवादमा निर्देशक भट्टलाई अमित शर्मा र सुनिल निउरेले सघाएका छन् । चलचित्रलाई ‘डेन्जरस गेम’ भनिएको छ । यो चलचित्रको पहिलो पार्टले बक्सअफिसमा औसत व्यापार गरेको थियो ।