शुक्रवारबाट प्रदर्शनमा आएको बलिउड सुपरस्टार अजय देवगन अभिनीत, निर्मित तथा निर्देशित चलचित्र ‘रनवे ३४’मा पाइलटहरूलाई गलत तरिकाले प्रस्तुत गरेको भन्दै भारतीय पाइलट महासंघले आपत्ति जनाएको छ । महासंघले एक विज्ञप्ति जारी गर्दै चलचित्र सत्य घटनामा आधारित भए पनि पूरै कपोलकल्पित ढंगले प्रस्तुत गरिएको जनाएको छ ।
चलचित्रमा अजय देवगनले एक सन्काहा पाइलटको भूमिका निर्वाह गरेका छन् । चलचित्रको निर्माण पक्षले सन् २०१५ मा दोहाबाट कोचिसम्म उडान भरेको विमानलाई क्र्यास ल्यान्डिङ घटनाको सत्य कहानी बताउँदै आएको छ । मौसम खराब र कम भिजिबिलिटी कारण विमानलाई आकस्मिक अवतरण गरिएको कथा चलचित्रमा छ ।
महासंघले चलचित्रमा देखाइएको घटना सत्यबाट धेरै टाढा रहेको बताएको छ । महासंघका सचिव क्याप्टेन सिएस रान्धावाले जारी गरेको विज्ञप्तिमा भनिएको छ, ‘रनवे ३४ को निन्दा गर्दछौं । चलचित्रमा पाइलट पेशालाई जुन तरिकाले देखाइएको छ यो सत्यबाट कोशौं टाढा छ। जुन ढंगले चलचित्रमा देखाइएको छ त्यसले विमानमा यात्रा गर्ने यात्रुको मनमा भ्रामक सन्देश पैदा गर्न सक्छ ।’
चलचित्रमा अजयसँगै अमिताभ बच्चन, रकुल पीत सिंह, बोमन इरानी, अंगिरा धर, आकांक्षा सिंहको पनि अभिनय छ । चलचित्रलाई समीक्षकले सकारात्मक प्रतिक्रिया दिएका छन् । तर, चलचित्रले बक्सअफिसमा भने गतिलो प्रदर्शन गर्न सकेको छैन ।