हिन्दी गीत ‘साम से ही दिल’मा नेपाली कलाकारको अभिनय

नेपाली कलाकारले अभिनय गरेको हिन्दी भाषाको गीत ‘साम से ही दिल’ भारतको प्रतिष्ठित कम्पनी टी सिरिजको यूट्युब च्यानलबाट सार्वजनिक भएको छ । आइतबार राजधानीमा एक कार्यक्रमका बीच गीतको भिडियो सार्वजनिक गरिएको हो । गीतमा सुमन शेखर मानन्धरको स्वर रहेको छ भने इम्तियाज वफाको शब्द तथा संगीत छ ।

नेपालको पर्यटकीय नगरी रारामा छायांकन भएको गीतको भिडियोमा नेपालीहरु कलाकारहरु सुनिल थापा, निर्जन थापा र धारणा शर्माको अभिनय छ । भिडियोमा राराको सुन्दरतालाई निकै आकर्षक रुपमा देखाइएको छ । गीतको भिडियोलाई जनकदीप पराजुलीले निर्देशन गरेका हुन् । भिडियोको कन्सेप्ट पनि उनकै हो ।

गीत सार्वजनिक कार्यक्रममा संगीतकार तथा गीतकार इम्तियाज वफाले यो गजलले मानिसको हृदय छुने बताउँदै भिडियोका दृश्यले नेपालको पर्यटन प्रवद्र्धनमा फाइदा पुग्ने बताए । नेपाली टिमसँग काम गर्न पाएकोमा उनले खुशी व्यक्त गरे । अब आफू नेपाली गीतमा पनि काम गर्ने तयारीमा रहेको उनले जानकारी दिए ।

त्यस्तै, गायक मानन्धरले हिन्दी र उर्दू समुदायलाई नेपाल भ्रमणमा आकर्षित गर्न यी भाषामा गीत तयार पारिएको जानकारी दिँदै गीतले नेपालको रारा ताल घुम्न आउने हिन्दी र उर्दूभाषी पर्यटकको संख्यामा बढ्ने विश्वास व्यक्त गरे । उनका अनुसार, यो गीत तीन वर्ष लगाएर तयार पारिएको हो । गीत सार्वजनिक कार्यक्रममा कलाकार नीर शाह, निर्माता राजकुमार राई लगायतको उपस्थिति थियो ।

जनकदीप प्रोडक्सनले निर्माण गरेको भिडियोको निर्माता गायक मानन्धर स्वयं हुन् । राजेन्द्र घिमिरे कार्यकारी निर्माता रहेको गीतको रेकर्डिङ मुम्बईको कैलाश स्टूडियोमा भएको थियो । ध्रुवराज पराजुलीको सम्पादन रहेको भिडियोका डिओपी अर्जुन तिवारी हुन् ।