ऐतिहासिक विषयमा चलचित्र ‘नालापानी’ बनाएका निर्देशक तथा निर्माता रिमेश अधिकारीले अब नेपालको इतिहासमा दोश्रो ठूलो हत्याकाण्ड मानिने कोत पर्वमा आधारित रहेर चलचित्र बनाउने भएका छन् । चलचित्रको नाम ‘कोत पर्व’ नै राखिएको छ । आउँदो माघ २१ गतेबाट छायांकन सुरु हुने चलचित्रको स्क्रिप्ट लेखनको काम सकिएर अहिले इतिहास विद्हरुसँग छलफल भैरहेको रिमेशले बताए ।
उनले चलचित्रमा पुराना कहलिएका कलाकारहरुसँगै पछिल्ला छिमलका चलेका कलाकारहरुको पनि अभिनय रहने जानकारी दिए । तर, अहिलेसम्म चलचित्रका लागि कुनै कलाकार छनोट भएका छैनन् । रिमेश अधिकारी फिल्म प्रोडक्सनको प्रस्तुति रहने चलचित्रमा केही स्वदेशी तथा विदेशी कम्पनीहरुले पनि निर्माणमा सहकार्य गर्ने बताइएको छ । महेश दवाडीले चलचित्रको कथा लेखेका हुन् ।
नेपालीसँगै हिन्दी र चाइनिज भाषामा पनि खिचिने चलचित्रलाई एकसाथ विश्वव्यापी रिलिज गरिने निर्देशक अधिकारीले जानकारी दिए । चलचित्रमा विदेशी कलाकारलाई पनि अभिनय गराउने योजना उनको छ । चलचित्रको सम्पूर्ण पोस्ट प्रोडक्सनको काम मुम्बईको स्टुडियोमा गरिने उनले बताए । ‘नालापानी’मा भएको कमी-कमजोरीलाई सुधार गर्दै यसपटक उत्कृष्ट चलचित्र बनाउने उनको दाबी छ ।
रानीको विश्वासपात्र गगनसिंहको हत्यारा पत्ता लगाउन भेला भएका भारदारहरूबीच विवाद हुँदा मच्चिएको हत्याकाण्डलाई ‘कोत पर्व’ भनिन्छ । यो हत्याकाण्डले तत्कालिन नेपालको अस्थिर राजनीतिलाई १०४ वर्षे राणा शासनतिर सुम्पेको थियो । यो घटनामा ११ चौतारिया, ६ पाण्डे, ३ थापा र ११ क्षेत्रीय भारादारको हत्या भएको थियो । जङ्गबहादुर राणा प्रधानमन्त्री बन्नु यसैको नतिजा थियो ।