काठमाडौँ।
बिहिबारबाट प्रदर्शनमा आएको नेपाली चलचित्र ‘परस्त्री’को बुधबार ग्राण्ड प्रिमियर शोको आयोजना गरिएको छ । प्रिमियरमा चलचित्रकर्मीदेखि पत्रकारसम्मको बाक्लो भिड लागेको थियो । साईकोलोजिकल थ्रिलर उक्त चलचित्र हेरेपछि यसको प्रशंसा गरिएको छ ।
प्रिमियरमा निर्देशक ज्ञानेन्द्र देउजा, दिवाकर भट्राई, अभिनेता खगेन्द्र लामिछाने, मुकुन भुषाल, निश्चल खड्का, कबिर खड्का, अभिनेत्री स्वस्तिमा खड्का, अन्जना बराईली लगायत बिशिष्ट पेशाकर्मीहरु पुगेका थिए । नव निर्देशक सुरज पाण्डेको निर्देशकिय क्षमतालाई लिएर प्रशंसा भएको छ भने सबै कलाकारहरुको अभिनयलाई पनि रुचाईएको छ ।
श्रीमान् श्रीमतीको जीवनमा आउने उतारचढाव र गलत केटासँग बिहे गर्दा युवतीले भोग्ने पिडाको कथामा चलचित्र निर्माण भएको छ । चलचित्रका मुख्य ३ कलाकारहरू कोशिश क्षेत्री, गौरव विष्ट र शिल्पा मास्केको कामका प्रशंसा भैरहेको छ । चलचित्र यात्रामा पहिलोपटक आफुसँग अभिनय गरेका सुरज पाण्डेको निर्देशनप्रति अभिनेत्री स्वस्तिमा खड्काले तारिफ गरिन् । आफैले स्क्रिन सेयर गरेको कलाकारले यस्तो राम्रो चलचित्र निर्देशन गरेकोमा आफुलाई गर्व लगेको उनले बताइन् ।
विवाहोत्तर सम्बन्धले निम्त्याउने पारिवारिक र सामाजिक संकटको कथावस्तुमा निर्माण भएको चलचित्रको निरज कँडेल छायांकन गरेका हुन् । चलचित्रमा कोशिस, शिल्पा र गौरवका अलवा अलिसा क्षेत्री, आशान्त शर्मा, रामबाबु रेग्मी, सरस्वती अधिकारी, झकेन बिसी र अर्पित न्यौपानेको अभिनय रहेको छ ।
चलचित्रमा शर्मिला पाण्डे र दीपेन्द्र के खनालले निर्माणमा सहकार्य गरेका छन् । खनाल चलचित्रका लेखकसमेत हुन् ।