काठमाडौँ।
चलचित्र ‘परदेशी–२’को नयाँ गीत ‘परदेशी छुकछुके रेलैमा’ सार्वजनिक गरिएको छ । युट्युब मार्फत सार्वजनिक यो गीत झ्याउरे भाकामा रहेको छ ।
यो गीतमा यस चलचित्रका निर्देशक समेत नारायण रायमाझीसँगै तेजेन्द्र गुरुङ, टिका पुन, देवी घर्ती र ममता गुरुङको स्वर रहेको छ । शब्द रचना रायमाझीले नै गरेका हुन् भने रायमाझी र प्रेमदेव गिरीले संयुक्त सङ्गीत दिएका छन् ।
यस गीतको भिडियोमा चलचित्रमा मुख्य कलाकारहरू अभिनेता प्रकाश सपूत, अभिनेत्री केकी अधिकारीसँगै अर्का अभिनेता प्रशान्त तामाङलाई पनि प्रस्तुत गरिएको छ । शेखर घर्ती मगर, पूर्ण लामा र विवेक खड्का, रविता मगर, पवित्रा गुरुङ, विन्दु खड्का, लाक्पा लामा, सरस्वती धिमाल, प्रजी अहिना सुनार लगायतको नृत्य भिडियोमा हेर्न सकिन्छ ।
भिडियोका निर्देशक रामजी लामिछाने र गोविन्द राई हुन् । यसमा नृत्य निर्देशन भने कुलमान नेपाली र शेखर घर्ती मगरको हो ।
‘परदेशी–२’ असोजको २६ गते रिलिज हुँदैछ । राजेश वंशल र नारायण रायमाझीको निर्माण रहेको चलचित्रमा प्रकाश, केकी र प्रशान्तका साथमा वर्षा सिवाकोटी, दिलीप रायमाझी, नीर शाह, रमा थपलिया, सबिन बास्तोला, देवेन्द्र बब्लु लगायतको अभिनय छ । चलचित्रको कथा एवं पटकथा रमेश बिजीले लेखेका हुन् । मानकृष्ण महर्जनको छायाङ्कन रहेको चलचित्रलाई दीर्घ खड्काले सम्पादन गरेका हुन् ।
गीत हेर्नुहोस्: