काठमाडौँ।
‘बिछोडको पीडा नसकी खप्न दसैँको बेलामा’, ‘खोलाको दुई किनार’, ‘सम्हाल पछ्यौरी’ ‘सम्झे है बुझे है यो मेरो जोबन’लगायत थुप्रै नेपाली गीत गाएकी खातीको गायिका दिलमाया खातीको निधन भएको छ । दमबाट पीडित ८४ वर्षिया खातीको गए राति दार्जिलिङस्थित आफ्नै निवासमा निधन भएको हो ।
सन् १९३९ को अक्टोबर ६ तारिखमा दार्जिलिङमा जन्मिएकी गायिका खाती पहिलो पटक सन् १९६२ मा काठमाडौँ आएकी थिइन् । रेडियो नेपालले आयोजना गरेको सङ्गीत प्रतियोगितामा प्रथम भई स्वर्ण पदक जितेकी खातीले यहाँका गायक–सङ्गीतकार को आग्रहमा उनले नेपाली गीत गाउन थालेकी थिइन् । सङ्गीतकार शिवशङ्कर, नातिकाजी श्रेष्ठ र गायिका तारादेवीको छत्रछायामा व्यावसायिक गीत गायनमा सक्रिय भएकी खातीले एक सय ५० भन्दा धेरै नेपाली गीत गाएकी छन् ।
‘मेलोडी मुन’ उपमाले परिचित दिलमायाले देवकोटा सम्मान, शिखा सुर सम्मान, लहानी नेपाल सम्मान, गुञ्जन सम्मान, भूपाल सङ्गीत पुरस्कार लगायतका सम्मान तथा पुरस्कार प्राप्त गरेकी थिइन् ।