काठमाडौँ।
शिक्षकले घुस खाएको दृश्यमा आपत्ति जनाउँदै केन्द्रीय चलचित्र जाँच समिति (सेन्सर बोर्ड)ले आपत्ति जनाएपछि आजै रिलिज भएको चलचित्र ‘कौसीद’को प्रदर्शन रोकिएको छ । समितिले केही दृश्य हटाई पुनः सेन्सरको लागि लैजान भनेको थियो । सोही अनुरूप पाँच मिनेट दृश्य काटेर लगेपछि सेन्सर पास भएको समितिका सदस्य ऋषिराज आचार्यले बताए ।
कैँची चलाउनुपर्ने बाध्यताको विषयमा आचार्यले कुनै संस्थामा कार्यरत सबैले घुस खाएको भन्ने सन्देश दिने खालको दृश्यले खराब सन्देश दिने देखिएकोले हटाउन लगाइएको बताए । उनले भने, “कोही व्यक्तिको आचरण खराब हुन सक्छ तर पुरै संस्था नै खराब हुँदैन । कदाचित पुरै संस्थाका व्यक्तिहरू नै खराब रहेछन् भने पनि त्यसको नतिजा राम्रो हुँदैन । चलचित्रमा सबै घुस्याहा देखाइएको र घुस खाएको कारण कुनै कारबाही भएको दृश्यहरू छैनन् । सबै खराब छन्, सबैले घुस खाएका छन्, तर सबै राम्रो भइरहेको छ भन्ने सन्देश देखिएकोले भ्रष्टाचारलाई प्रोत्साहन गर्नुहुँदैन भन्ने उद्देश्यले दृश्य काटिएको हो ।”
बिहान र दिउसो चलचित्र रिलिज नभएपछि हलले टिकट काटेका दर्शकलाई शुल्क फिर्ता गरेका छन् । ऋचा शर्मा र भोलाराज सापकोटाको शीर्ष भूमिका रहेको यस चलचित्रका निर्देशक कुमार भास्कर हुन् ।