काठमाडौं। आफूले विद्यालय तथा क्याम्पसबाट आर्जन गरेको शिक्षा कतै काम नलागेपछि १८ वर्षपछि विद्यालय पुगी आफूले पढ्दा लागेको खर्च फिर्ता माग्ने विद्यार्थीको कथामा बनेको नाटक ‘रिफन्ड’ मञ्चन हुने भएको छ ।
यही शनिवारदेखि काठमाडौंको सुकेधारास्थित अस्कर इन्टरनेशनल कलेजको थिएटरमा हरेक दिन साँझ ५ बजे मञ्चन हुने यो नाटक एक हप्तासम्म लगातार चल्ने निर्माता सङ्गम बिस्टले बताइन् । जीवन बस्नेतले निर्देशन गरेको ‘रिफन्ड’मा अस्कर कलेजका १५औँ र १६औँ ब्याचका अभिनय विषय अध्ययनरत विद्यार्थीहरूको अभिनय रहनेछ ।
कक्षा ११ को अनिवार्य अङ्ग्रेजी विषयको पुस्तकमा रहेको कथामा आधारित यो नाटक डान्स फिवरले निर्माण गरेको हो भने सह निर्माता अस्कर इन्टरनेशनल कलेज हो । यसका लेखक फ्रिट्ज करिन्थी हुन् भने नेपाली अनुवाद प्रजल दुलालले गरेका छन् ।