काठमाडौं। बिहीबार बिहान करिब ३ बजे कार दुर्घटनामा परी घाइते भएका ‘कमेडी च्याम्पियन सिजन २’का प्रतिस्पर्धी सुशान्त बस्यालको अवस्था गम्भीर बनेको छ। उनको मध्यपुर ठिमी अस्पतालमा उपचार भइरहेको छ ।
अस्पताल श्रोतले उनको अझैसम्म अचेत अवस्थामा नै रहेको जनाएको छ। टाउकोमा गहिरो चोट लागेका उनलाई हाल भेन्टिलेटरमा राखेर उपचार भइरहेको छ। बस्यालसँगै दुर्घटनामा परेका पवन भट्टराई, प्रकृति गिरी र रजनिस अर्यालको मध्यपुर ठिमी अस्पतालमा नै उपचार भइरहेको छ।
दुर्घटनामा परेका कमेडी च्याम्पियनका निर्देशक विशाल भण्डारी र पूजन अधिकारी सामान्य उपचारपछि प्रहरी हिरासतमा छन्।
उनीहरू नगरकोटबाट काठमाडौं आउँदै गर्दा भक्तपुरको जगातीमा सडकमा अनियन्त्रित भएर रोकिराखेको टिप्परसँग ठोकिएको बताइएको छ।