‘तक्मे बुढा’को रुपमा परिचित कलाकार विल्सन विक्रम राईले चलचित्र ‘मैझारो’बाट निर्देशनमा डेब्यु गर्ने भएका छन् । सोमबार उनले मुख्य भूमिकामा अभिनेता धीरज मगरलाई अनुबन्ध गर्दै चलचित्र निर्माणको घोषणा गरेका हुन् । यसमा विल्सन स्वयंको लेखन रहेको छ ।
यस चलचित्रमा अनमोल गुरुङ र तोरेम्पा हाङ राईको संगीत रहनेछ भने सौरभ लामाले छायांकन गर्नेछन् । विल्सनका अनुसार अन्य कलाकारहरूको नाम केही दिनमा सार्वजनिक गरिनेछ । आगामी साउनको पहिलो हप्ताबाट चलचित्रको छायांकन सुरु हुनेछ ।
निर्देशक राईले ‘मैझारो’को छायांकन इलाम र पाँचथरका रमणीय स्थानहरूमा गरिने बताए । उनका अनुसार यो चलचित्र सामाजिक कथावस्तुमा आधारित भएर बन्नेछ । पूर्वी पहाडको जीवनशैली, संस्कृति र सामाजिक यथार्थताको चित्रण चलचित्रमा गरिने उनको भनाइ छ ।