काठमाडौं – नेपाली सुगम सङ्गीतमा आफ्नो अलग्गै र विशिष्ट पहिचान बनाउन सफल गायक तथा सङ्गीतकार हरि लम्साल अब चलचित्र निर्देशनको मैदानमा उत्रिएका छन्। उनकै लेखन तथा निर्देशनमा निर्माण हुन लागेको नयाँ नेपाली चलचित्र ‘बा : एक योद्धा’को सोमबारबाट विधिवत् रूपमा छायाङ्कन आरम्भ गरिएको छ। काठमाडौंस्थित आराध्यदेव पशुपतिनाथ मन्दिरको परिसरमा निर्माण टोलीको उपस्थितिमा धार्मिक विधिअनुसार पूजाआजा र शुभ मुहूर्त गर्दै चलचित्रको सुटिङ सुरु गरिएको हो।
आर्टिस्टिक इन्टरटेनमेन्टको ब्यानरमा बन्न लागेको यस चलचित्रले नेपाली समाजको एउटा अत्यन्तै मार्मिक र यथार्थपरक पाटोलाई पर्दामा उतार्ने जमर्को गरेको छ। चलचित्रको सार्वजनिक शीर्षक र थिमले नै यो एउटा विशुद्ध पारिवारिक तथा सामाजिक कथावस्तुमा आधारित रहेको प्रस्ट पार्छ। सन्तानको उज्ज्वल भविष्यका खातिर एउटा बाबुले जीवनभर गर्ने त्याग, अनवरत सङ्घर्ष र मौन रूपमा वहन गर्ने गहन जिम्मेवारीलाई चलचित्रले ‘योद्धा’को विम्बमार्फत प्रस्तुत गर्ने लक्ष्य राखेको छ।
चलचित्रको निर्माण गायक तथा सर्जक वसन्त लम्सालले गर्दैछन्। यसअघि अभिनेता विपिन कार्की अभिनीत चलचित्र ‘कर्मा’ निर्माण गरिसकेका लम्सालले यस प्रोजेक्टमार्फत दर्शकलाई उत्कृष्ट र भावनात्मक सामाजिक ड्रामा पस्कने विश्वास लिएका छन्।
छायाङ्कनको काम उत्साहजनक रूपमा अगाडि बढिसके तापनि निर्माण पक्षले चलचित्रमा अभिनय गर्ने मुख्य कलाकारहरूको नाम भने हालसम्म गोप्य नै राखेको छ।