काठमाडौं – नेपाली चलचित्र उद्योगका भर्सटायल अभिनेता दयाहाङ राईको ४६औँ जन्मदिनको अवसर पारेर उनको मुख्य भूमिका रहेको नयाँ चलचित्र ‘पेन्सन पट्टा’को प्रदर्शन मिति घोषणा गरिएको छ। निर्माण पक्षले मंगलबार एक पोस्टर सार्वजनिक गर्दै हिन्दू नारीहरूको महान् पर्व हरितालिका तीजको छेको पारेर आगामी भदौ २६ गतेदेखि चलचित्रलाई दर्शकमाझ ल्याउने औपचारिक जानकारी दिएको हो। भदौ २९ गते पर्ने तीजको सार्वजनिक बिदाको व्यावसायिक लाभ लिने रणनीतिका साथ चलचित्रको रिलिज मिति तय गरिएको देखिन्छ।
प्रदर्शन मितिसँगै सार्वजनिक गरिएको फस्टलुक पोस्टरले दर्शकको ध्यानाकर्षण गराएको छ। नेपाली हाते कागजलाई कलात्मक रूपमा पृष्ठभूमिमा प्रयोग गरिएको उक्त पोस्टरमा अभिनेता दयाहाङलाई मात्र प्रस्तुत गरिएको छ। काँधमा झोला भिरेर कुनै गन्तव्यतर्फ निस्किन लागेका दयाहाङको अनुहारमा झल्किएको गम्भीरता, थकान र चिन्ताले चलचित्रमा उनको पात्रले भोगेको संघर्षपूर्ण जीवनकथा र यथार्थलाई जीवन्त रूपमा संकेत गरेको छ।
‘माओत्से गुरुङ फिल्म्स’ को ब्यानरमा निर्माण भएको यस चलचित्रलाई कलाकार तथा निर्देशक माओत्से गुरुङ स्वयंले लेखन तथा निर्देशन गरेका हुन्। चलचित्रमा दयाहाङका अलावा सुनिल थापा, पशुपति राई, गौमाया गुरुङ, बुद्धि तामाङ, विल्सन विक्रम राई, राज थापा काउछा, लुनिभा तुलाधर, विश्वास गुरुङ, माया गुरुङ, यासिली राई, डिवी गुरुङ र प्रतीक्षा गुरुङलगायतका स्थापित तथा नयाँ अनुहारहरूको बलियो अभिनय हेर्न पाइनेछ।
मीन कोन्मे गुरुङ (सिक्लेस), भोजबहादुर गुरुङ (युके) र सपना गुरुङद्वारा संयुक्त रूपमा निर्माण गरिएको यस चलचित्रमा सुशन प्रजापतिको छायांकन र सुरेन्द्र पौडेलको सम्पादन रहेको छ। त्यसैगरी, चलचित्रका गीतहरूमा मनोज थापा मगर, शिव बराइली र सुरुङ गुरुङले संगीत भरेका छन्। समग्रमा, बलियो स्टारकास्ट र अनुभवी प्राविधिक टोलीको साथमा आउन लागेको ‘पेन्सन पट्टा’लाई दर्शकले व्यग्रताका साथ पर्खिरहेका छन्।