ठुलोपर्दा डटकम, काठमाण्डौ ।
नेपाली मोडल आस्था पोखरेल भारतीय एनिडभिटी गुड टाइम्सको कार्यक्रम ‘किंगफिसर सुपरमोडल–२’ सिरिजकी विजेता भएकी छिन् । यससँगै उनी किंगफिसर क्यालेन्डरको आवरणमा देखिने निश्चित भएको छ । ४२ दिन चलेको सुपरमोडल सिरिजमा उनले विभिन्न देशका ९ प्रतिस्पर्धीलाई पछि पार्दै विजयी बनेकी थिइन् ।
किंगफिसर क्यालेन्डर २०१५ लागि क्यालेन्डर गर्ल छनोट गर्न सुपर मोडल प्रतियोगिता आयोजना गरिएको थियो । बलिउड अभिनेत्री नेहा धुपियाको प्रशिक्षण पाएका ९ मोडलहरुलाई पछार्न सफल आस्था चार वर्षअघिदेखि मोडलिङमा सक्रिय छिन् । आस्थाले आफ्नो सफलतासँगै आफ्नो सपना पूरा भएको प्रतिक्रिया दिएकी छिन् ।
२००३ देखि सुरु यस प्रतियोगितामा क्याट्रिना कैफ, याना गुप्ता, पुनम पाण्डे, दीपिका पादुकोण, नरगिस फाकरी र उज्ज्वला रावत जस्ता कलाकारहरु सहभागी भइसकेका छन् ।