‘सुन रहा है न’ का गायक अंकित नेपाल आँउदै

‘आशिकी २’, ‘एक भिलेन’, ‘एक्सन ज्याक्सन’, ‘पिके’, ‘रोय’ जस्ता बलीउडका सफल चलचित्रमा आवाज दिएका उदीयमान भारतीय गायक तथा संगीतकार अंकित तिवारी नेपाल आँउने भएका छन् ।

असोज १६ गते जावलाखेलको फुटबल मैदानमा आयोजना हुने कन्सर्टमा सहभागी हुन उनी नेपाल आँउन लागेका हुन् । आयोजकले आइतबार पत्रकार सम्मेलन गर्दै अंकित नेपाल आँउन लागेको जानकारी दिएको हो । उनलाई प्लानेट नेपाल इन्टरटेनमेन्टले काठमाडौं ल्याउन लागेको हो । प्लानेटका प्रबन्ध निर्देशक नासिर हुसेनले अंकितलाई गत मे महिनामै ल्याउने तयारी रहेको भएपनि भूकम्पका कारण ल्याउन नसकेको बताए ।

कन्सर्टको आयोजनाबाट आएको मुनाफाको केही प्रतिशत हामी भूकम्प पीडितका लागि पनि खर्चने उनले पत्रकार सम्मेलनमा जानकारी गराएका थिए । ‘आशिकी २’को ‘सुन रहा है न’ गीतबाट पाश्र्व गायनमा स्थापित अंकित तिवारीले ‘एक भिलेन’को गीतबाट थप उचाइ पाएका थिए । दिउँसो दुई बजेबाट सुरु हुने कन्सर्टमा सहभागि हुन चाहानेहरुले ५ सय, १५ सय र ३ हजारको टिकट लिनु पर्नेछ ।

कार्यक्रममा अंकितसँगै गाउनलाई नेपाली गायक सविन राई र कववेव ब्यान्डसँग कुरा भईरहेको पनि आयोजकले जनाएको छ । पत्रकार भेटघाटमा अंकित असोज १४ मै नेपाल आउने र नेपाली मिडियासँग अन्तरक्रिया गर्ने आयोजकले जनाएको छ । १७ गते देश फर्कने उनलाई जानुअघि सिटी टुर र माउन्टेल फ्लाइट गराउने योजना रहेको आयोजकले जानकारी गराएको छ ।