ठुलोपर्दा डटकम, काठमाण्डौ।
रियल लाइफमै प्रेमी-प्रेमीका रहेका नायिका नीता ढुंगाना र नव नायक आमेश भण्डारी अभिनित चलचित्र ‘फूलै फूलको मौसम तिमीलाई’ को अडियो र भिडियो सिडी सार्वजनिक गरिएको छ ।
प्रधानमन्त्री निवास बालुवाटारमा सोमबार आयोजना गरिएको कार्यक्रममा प्रधानमन्त्री ओलीले चलचित्रको अडियो र भिडियो सिडी सार्वजनिक गरेका हुन् । त्यस्तै ओलीले सिडी सार्वजनिक गदै ‘फूलै फूलको मौसम तिमीलाई’ हेर्न मन भएको जिकिर गर्दै किन्नका लागि १० टिकट उपलब्ध गराईदिन आग्रह गरेका छन् ।
देशको असहज परिस्थितिमा पनि चलचित्रकर्मीले गरिरहेको काम प्रशंसनिय रहेको बताउँदै प्रधानमन्त्रीले कला तथा सँस्कृतिको विकासले देशको विकासमा समेत टेवा पुर्याउने उल्लेख गरे । त्यस्तै कार्यक्रममा बोल्दै निर्देशक दिनेश डिसीले भने चलचित्र ‘फूलै फूलको मौसम तिमीलाई’ले गर्ने व्यापारिक नाफाबाट धादिङमा पुल निर्माण गर्न आर्थिक सहयोग गर्ने पनि घोषणा गरे ।
प्रधानमन्त्री निवासको कार्यक्रममा चलचित्रकी नायिका नीता ढुंगाना, नायक आमेश भण्डारीसहित निर्माता अमिर अली, गायक राजेश पायल राई, कोरियोग्राफर रामजी लामिछाने लगायतका कलाकार देखी पत्रकारहरुको उपस्थिती रहेको थियो । यो चलचित्र फागुन २१ गते देखि प्रदर्शनमा आउँदैछ ।