चलचित्र ‘सुल्तान’को प्रचार-प्रचारको दौरानमा बलात्कार पीडित युवतीको उदाहरण दिँदै सलमान बोलेपछि उनलाई निकै मुश्किल आईलागेको छ । भारत हरियाणास्थित हिसारकी सामूहिक बलात्कार पीडित युवतीले सलमानसँग दश करोड भारु. क्षतिपुर्ती माग गरेकी छिन् ।
पीडितले पञ्जाब तथा हरियाणा हाई कोर्टको माध्यमबाट सलमान खानलाई नोटिस पठाएकी हुन् । उनले सार्वजनिक टिप्पणीबाट आफ्नो छवि अझै धमिलो भएको बताएकी छिन् । उनले सलमानको भनाईबाट आफुलाई गहिरो चोट लागेको बताएकी छिन् । उनि अहिले पनि एक मानसिक र शारीरिक आघातबाट गुज्रिरहेकी छिन् ।
पीडितका वकिलका अनुसार नोटिस पाएको १५ दिन भित्र १० करोड माग गरिएको छ । अन्यथा सलमान विरुद्द सिभिल तथा आपराधिक कानूनको उल्लंघन गरेको भन्दै मुद्दा हालिने छ ।
नाबालिग दलित किशोरीलाई आठ जनाले सामूहिक बलात्कार गरेका थिए । यो घटनाबाट मर्माहत भएका पीडितका पिताले १८ सेप्टेम्बर २०१२ मा आत्महत्या गरेका थिए ।
सलमानले एक अन्तरवार्तामा भनेका थिए, ‘सुल्तानको कुश्ती दृश्यको छायांकनको बेला म यति थाक्थे कि अखडाबाट बाहिर आउँदा सामूहिक बलात्कार पीडित किशोरी जस्तै महशुस हुन्थ्यो । यो निकै मुश्किल थियो । म पाईला अघि बढाउन सक्दैनथिएँ’ ।