ठुलोपर्दा डटकम, काठमाण्डौ।
नेपाली चलचित्रका अवार्ड यति धेरै हुन थाले कि दर्शक र मिडियालाई नै यसबारेमा चासो हुन छोडेको छ । अवार्डको शुरुवातमा हलमा टनाटन दर्शक भएपनि अन्तिममा भने औँलामा गन्न सकिने मात्र भेटिन्छन् । यसको कारण हो प्रचार अनुसारको कार्यक्रम नभई अनावश्यक बढि हुनु र स्तरियता नहुनु । आयोजकले भव्य भयो भन्नु र मिडियाका क्यामेरा आउने तस्वीरले बताउनु नितान्त अलग दृश्य हुन आउँछन् ।
यतिबेला शुक्रबार दुबइमा आयोजना हुन लागेको ‘नवौँ नेफ्टा अवार्ड’को चर्चा गर्दैछौँ । यो अवार्डमा पनि माथी उल्लेखित अवस्था हुने निश्चित छ । प्रचारको समयमा यो अवार्डले नेपालका स्टार कलाकारको नाम समेटेको छ तर, ति कतिपय कलाकार जानेछैनन् ।
दुबई अवार्डमा सहभागी नै नहुने कलाकारको नाम समेत प्रचार गरिएको पाइएको छ । आयोजकलाई अवार्डमा सहभागी नहुने जानकारी गराएका नायक अनमोल केसीको नाम समेत पोस्टरमा राखेर बेचिएको छ ।
अनमोलका पिता नायक भुवन केसीले अवार्डमा अनमोल र आफु सहभागी नहुने बताएका छन् । उनले भनेका छन्, ‘दुबइमा भने हामी दुई आउँदैछौ भनेर टिकट वेचिएको रहेछ । म हाम्रा शुभचिन्तक र फ्यानहरुलाई अवार्डमा सहभागी नहुने जानकारी गराउँछु’ ।
अनमोलले आफ्नो आगामी चलचित्र ‘कृ’को लुक्स सार्वजनिक गर्न नमिल्ने भन्दै आफू सार्वजनिक कार्यक्रममा नजाने बताएका थिए । तर, आयोजकले भने अनमोल केसी आउँदैछन् भनेर प्रचार गरिरहेको छ ।
हेर्नुहोस् प्रचारात्मक पोस्टर:
उक्त अवार्डमा अन्य नाम चलेका कलाकार पनि सहभागी नहुने वुझिएको छ । तर, उनीहरुको फोटो राखेर प्रचार गरिएको छ । दयाहाङ राई, सौगात मल्ल, नायिका रेखा थापा, प्रियंका कार्की लगायतका कलाकार पनि अवार्डमा सहभागी नहुने वुझिएको छ तर, उनीहरुको फोटो र नाम प्रचार सामाग्रीमा उल्लेख छ ।
अनमोललाई नेफ्टाले ‘पपुलर स्टार अफ द इयर’को अवार्ड दिने आश्वासन समेत दिएको बताईएको छ भने भूवनलाई पनि कुनै गरिमामय अवार्ड दिने बताएर जान आग्रह गरेको थियो । यसअघिका केहि विदेशमा भएका अवार्डले त्यहाँ पुगेकालाई अवार्ड दिएका थिए, केहिले भने नेपालमा नै डिल गरेका थिए र सहभागि गराएका थिए ।
के यहि नै हो त नेपाली चलचित्रको स्तर ? जो विदेश जान्छन्, जसको भिषा लाग्छ उसैले पाउने हो त अवार्ड ? अब यस्ता अवार्डहरुमा सहभागि हुने-नहुने दर्शक तथा चलचित्रकर्मीले आँफैले विचार गर्नुहोस् । यो उद्योग तपाईँको हातमा छ ।