‘तेस्रो एपिक नेपाल म्युजीक अवार्ड २०७८’ का उत्कृष्ट पाँच मनोनयनलाई प्रमाणपत्र वितरण गरिएको छ । भक्तपुरको मध्यपुर थिमि नगरपालिकासँगको सहकार्यमा हुन लागेको अवार्डका ३२ विधाका सम्पुर्ण मनोनयनलाई शनिवार आयोजित कार्यक्रममा प्रमाणपत्र वितरण गरिएको हो । कार्यक्रम मध्यपुर थिमी नगरपालिकाको कुमारीपार्क परिसरमा सम्पन्न भएको हो ।
कार्यक्रममा बोल्दै प्रमुख अतिथि मध्यपुर थिमि नगरपालिकाका नगरप्रमुख मदन सुन्दर श्रेष्ठले नेपाल कला क्षेत्रसँग जोडिन पाउँदा खुसी लागेको बताए । श्रेष्ठले मध्यपुर थिमि भित्रका पुरातात्विक सम्पदा, संस्कृति जगेर्ना गर्ने उद्धेश्यले नगरपालिकाले अवार्डसँग सहकार्य गरेको बताए ।
आयोजक संस्थाकी अध्यक्ष बबिता श्रेष्ठले मध्यपुर थिमि नगरपालिकाले सहकार्य गरेकोमा धन्यवाद दिईन् । बबिताका अनुसार आगामी मंसिर ११ गते अवार्ड समारोह हुनेछ । अवार्ड समारोह मध्यपुर थिमि नगरपालिका वडा नं. ८ बोडे स्थित कुमारी पार्कमै हुने जानकारी गराइयो ।
महजोडीलाई लाईफटाईम तथा पराजुलीलाई पत्रकारीता सम्मान
कार्यक्रममा बरिष्ठ कलाकारद्वय मदनकृष्ण श्रेष्ठ र हरिवंश आचार्य (मह जोडी) लाई नगदसहितको लाईफटाईम अचिभमेन्ट सम्मान प्रदान गरिने घोषणा गरियो । यस्तै नेपाली कला क्षेत्रमा लामो समयदेखी पत्रकारिताको माध्यमबाट योगदान पुऱ्याएका पत्रकार जीवन पराजुलीलाई कला पत्रकारिता सम्मान प्रदान गरिने घोषणा गरियो । दुवै सम्मान अवार्ड समारोहमा प्रदान गरिनेछ ।
