काठमाडौं। चर्चित भारतीय टेलिश्रृंखला ‘रामायण’ मा सीताको भूमिका निभाउँदै अभिनय गर्न आएकी अभिनेत्री दीपिका चिखलियाले रामायणको कथाबाट धेरै कुरा सिक्न सकिने बताएकी छन्।
शनिवार काठमाडौंको जनजाति कल्याण आश्रम नेपालद्वारा सञ्चालित ‘आमाको माया’ छात्रावासको १४ औँ वार्षिकोत्सव समारोहमा बोल्दै उनले भगवान् रामको असल पुत्र, भाइ र श्रीमान् रहेको समेत बताइन्। उनी भन्छिन्, “रामायणबाट धेरै कुरा सिक्न सकिन्छ। रामजीको चरित्रबाट भगवान् राम आदर्श र असल पुत्र भएको जानकारी कथा रामायणले दिएको छ। रामायणले हरेक भागबाट केही न केही सिकाउँछ।”
नेपालमा समेत अभिनेत्री चिखलियाका धेरै प्रशंसकहरू छन्। शुक्रवार नेपाल आइपुगेकी उनी आइतबार भारत जाँदै छिन्। उनले आइतबार पशुपतिनाथ मन्दिरमा पूजा गरेकी छिन्।
चिखलियाले टेलिभिजन, बलिउड र मलायलम फिल्महरूमा अभिनय गरेकी छिन्।