९७औँ अस्कर अवार्डमा सर्वश्रेष्ठ चलचित्र बन्यो रोमान्टिक कमेडी ‘अनोरा’

काठमाडौं – लस एन्जलसको डल्बी थिएटरमा सोमबार आयोजित ९७औँ एकेडेमी अवार्ड (अस्कर) समारोहमा सिन बेकर निर्देशित रोमान्टिक कमेडी चलचित्र ‘अनोरा’ ले सर्वश्रेष्ठ चलचित्रको उपाधि जितेको छ । नेपाली समयअनुसार सोमबार बिहान सम्पन्न भएको कार्यक्रममा विभिन्न २३ विधामा उत्कृष्टलाई अवार्ड प्रदान गरियो ।

‘अनोरा’ न्यूयोर्कको ब्रुकलिनकी यौनकर्मी एनोरा मिखेवा र एक रुसी धनाढ्यका छोरा भान्या जाखारोभबीचको विवाह वरिपरि केन्द्रित छ । विवाहपछि तिनीहरूले सामना गर्ने चुनौती तथा सामाजिक द्वन्द्वलाई रोचक ढङ्गले प्रस्तुत गरिएको छ । सिन बेकरले लेखन, निर्देशन र सम्पादन गरेका यो चलचित्र कान्स चलचित्र फेस्टिभलमा ‘पाम द ओर’ जितिसकेको थियो ।

अन्तर्राष्ट्रिय सञ्चारमाध्यमका अनुसार मुख्य विजेता सूची यस प्रकार छ:

• सर्वश्रेष्ठ चलचित्र: ‘अनोरा’

• सर्वश्रेष्ठ निर्देशक: सेन बेकर (‘अनोरा’)

• सर्वश्रेष्ठ अभिनेता: एड्रियन ब्रोडी (‘द ब्रुटलिस्ट’)

• सर्वश्रेष्ठ अभिनेत्री: मिकी माडिसन (‘अनोरा’)

• सर्वश्रेष्ठ सहायक अभिनेता: किरन कल्किन (‘अ रियल पेन’)

• सर्वश्रेष्ठ सहायक अभिनेत्री: जोय साल्दाना (‘एमिलिया पेरेज’)

• सर्वश्रेष्ठ सम्पादन: सिन बेकर (‘अनोरा’)

• सर्वश्रेष्ठ छायांकन: लल क्रली (‘द ब्रुटलिस्ट’)

• सर्वश्रेष्ठ मौलिक पटकथा: सिन बेकर (‘अनोरा’)

• सर्वश्रेष्ठ अनुकूलित पटकथा: ‘कन्क्लेभ’

• सर्वश्रेष्ठ प्रोडक्सन डिजाइन: ‘विक्ड’